Shocking: ఇండోనేషియాలోని బాలి దీవుల సమీపంలో ఘోర సముద్ర ప్రమాదం చోటుచేసుకుంది. ప్రయాణికులతో వెళ్తున్న ఓ ఫెర్రీ సముద్రంలో మునిగిపోయిన ఘటన దేశవ్యాప్తంగా తీవ్ర విషాదాన్ని మిగిల్చింది. ఈ ప్రమాదంలో ఇద్దరు మృతిచెందగా, ఇంకా 43 మంది గల్లంతు అయినట్లు అధికారిక సమాచారం.ఈ ప్రమాదం సమయంలో ఫెర్రీలో 65 మంది ప్రయాణికులు ఉన్నట్లు గుర్తించారు. వీరిలో కొంతమంది మాత్రమే తేరుకుని సురక్షితంగా బయటపడగలిగారు. మిగిలిన 43 మంది ఇంకా గల్లంతయ్యే ప్రమాదంలో ఉన్నారు. ఈ ప్రమాద సమాచారం వెలుగులోకి వచ్చిందాకా అక్కడి వాసులు, అధికారులు ఒకింత ఆలస్యం గానే స్పందించారు.
మొదలైన అరగంటలోనే..
ఈ ఫెర్రీ తూర్పు జావాలోని కెటాపాంగ్ పోర్ట్ నుంచి బయలుదేరింది. అయితే, ప్రయాణం ప్రారంభమైన కేవలం అరగంట తర్వాతే ఫెర్రీ సముద్రంలో తలకిందులయ్యింది. చాలా వేగంగా జరిగిన ఈ సంఘటన ప్రయాణికులకు ఊహించని విధంగా షాక్ ఇచ్చింది. కొందరు నీటిలో నుంచి ఈదుకుంటూ బయటపడగా.. ఎక్కువ మంది ప్రమాదంలో చిక్కుకుని గల్లంతైనట్లు తెలుస్తోంది.
భారీ వాహనాలతో లోడెడ్ ఫెర్రీ
ఈ ఫెర్రీలో 22 కార్లు, 14 భారీ ట్రక్కులు కూడా ఉన్నట్లు అధికారులు తెలిపారు. ట్రక్కులు, కార్లు కలిపి మొత్తం వాహన భారం ఎక్కువవ్వడం కూడా ప్రమాదానికి కారణమై ఉండవచ్చని అనుమానాలు వ్యక్తమవుతున్నాయి. ప్రయాణికులతో పాటు వాహనాలను కూడా తరలిస్తున్న సమయంలో ఫెర్రీ అదుపు తప్పినట్లు తెలుస్తోంది. ప్రమాదం జరిగిన వెంటనే ఇండోనేషియా తీర రక్షణ దళాలు, రెస్క్యూ బృందాలు ఘటనా స్థలానికి చేరుకున్నాయి. హెలికాప్టర్లు, డ్రోన్లు, బోట్ల సహాయంతో మిస్సయ్యినవారిని గాలిస్తున్నారు. సముద్రపు అలలు ఎక్కువగా ఉండడం వల్ల గాలింపు చర్యలకు ఆటంకం ఏర్పడుతోందని అధికారులు చెబుతున్నారు.
ప్రమాదంపై విచారణ
ప్రస్తుతం ఈ ప్రమాదానికి వాతావరణ పరిస్థితులా? ఫెర్రీలో టెక్నికల్ లోపమా? అధిక లోడ్ వేశారా? అనే కోణాల్లో అధికారులు దర్యాప్తు చేస్తున్నారు. ఇటువంటి ఘటనలు అక్కడ గతంలో కూడా జరిగిన నేపథ్యంలో, ఫెర్రీల భద్రతపట్ల ఇండోనేషియా ప్రభుత్వం తీవ్రంగా స్పందించింది. ఈ ఘటనను సీరియస్గా తీసుకుంటూ.. అన్ని ఫెర్రీల్లో రక్షణ లోపాలు గుర్తించేందుకు ప్రత్యేక బృందాల్ని ఏర్పాటు చేయనున్నట్లు సమాచారం.
ఈ ఘటనలో గల్లంతైనవారి కుటుంబాల్లో తీవ్ర విషాదం నెలకొంది. ఇలా ప్రతి సంవత్సరం వందల మంది సముద్ర ప్రమాదాల్లో ప్రాణాలు కోల్పోతున్నారు. సరైన భద్రతా ప్రమాణాలు లేకపోవడం, లోడ్ మించి ప్రయాణాలు చేయడం, వాతావరణ పరిస్థితులను తక్కువ అంచనా వేయడం లాంటి కారణాలే ఇలాంటి ప్రమాదాలకు దారితీస్తున్నాయి.
