Bangalore | జూన్ 7: ఐపీఎల్ 2025(IPL 2025) విజేతగా నిలిచిన రాయల్ ఛాలెంజర్స్ బెంగళూరు (RCB) విక్టరీ పరేడ్ విషాదంగా మారిన విష‌యం తెలిసిందే. సెలబ్రేషన్స్‌లో భాగంగా బెంగళూరు నగరంలో నిర్వహించిన ఘన ర్యాలీలో ఉత్సాహంగా పాల్గొన్న అభిమానుల మ‌ధ్య తొక్కిసలాట చోటుచేసుకుంది. ఈ దుర్ఘటనలో 11 మంది ప్రాణాలు కోల్పోగా, 50 మందికి పైగా గాయపడ్డారు. తీవ్రంగా గాయపడిన వారిలో కొంతమంది పరిస్థితి విషమంగా ఉన్నట్టు సమాచారం.
లక్షలాది మంది అభిమానులు ఒక్కసారిగా ర్యాలీ ప్రాంగణానికి త‌ర‌లిరావడంతో పరిస్థితి అదుపు తప్పింది. సరైన భద్రతా ఏర్పాట్లు లేకపోవడంతో గందరగోళం నెలకొని, తొక్కిసలాటకు దారితీసింది. ఈ ఘటనపై దేశవ్యాప్తంగా తీవ్ర విచారం వ్యక్తమవుతోంది. దీనికి కార‌ణం ఎవ‌రు.. బాధ్యత ఎవ‌రిది? అనే అంశంపై పెద్ద చర్చే మొదలైంది. ప్రభుత్వానిదా, ఆర్సీబీదా, లేక భారత క్రికెట్ కౌన్సిల్ (BCCI)దా అనే వాదనలు ఊపందుకున్నాయి.
ఈ తరుణంలో బీసీసీఐ స్పందించింది. బీసీసీఐ సెక్రటరీ దేవజిత్ సైకియా మాట్లాడుతూ, “ఈ ప్రమాదానికి ఆర్సీబీయే పూర్తి బాధ్యత వహించాలి. సరైన ప్రణాళిక లేకుండానే హడావుడిగా కార్యక్రమాన్ని చేపట్టారు. ఇది తీవ్ర నిర్లక్ష్యం” అని వ్యాఖ్యానించారు.
“బీసీసీఐ నిర్వహించే కార్యక్రమాలు ఎంతపకడ్బందీగా జరుగుతాయో అందరికీ తెలుసు. ముంబైలో జరిగిన టీ20 వరల్డ్‌కప్ విన్నింగ్ సెలబ్రేషన్స్‌ను అందరూ చూశారు. అలాంటి ప్రణాళికలు, భద్రతా చర్యలు లేకుండానే బెంగళూరులో ఆర్సీబీ పరేడ్ జరిపింది. ఇది ముమ్మాటికీ బాధ్యతారాహిత్యమే. ఇకపై ఇలాంటి ఘటనలు జరగకుండా చూస్తాం. క్రికెట్ జట్లకు మార్గదర్శకాలు ఇవ్వబోతున్నాం,” అని ఆయన తెలిపారు.
బీసీసీఐ తాలూకు గవర్నింగ్ బాడీ ఇకపై IPL ఫ్రాంచైజీల సెలబ్రేషన్స్, పరేడ్ కార్యక్రమాలపై ప్రత్యేక నియంత్రణ తీసుకురాబోతోందని సమాచారం. దేశవ్యాప్తంగా క్రికెట్‌కు ఉన్న క్రేజ్ దృష్టిలో పెట్టుకుని, వేలాది అభిమానుల ప్రాణాలకు ముప్పు లేకుండా చర్యలు తీసుకోవాలని నిపుణులు సూచిస్తున్నారు.
ఈ ఘటనపై రాష్ట్ర ప్రభుత్వం విచారణకు ఆదేశించినట్టు తెలుస్తోంది. బాధిత కుటుంబాలకు సానుభూతి తెలుపుతూ పరిహారాలు ప్రకటించవచ్చని సమాచారం. అభిమానుల ఉత్సాహం విషాదంలోకి మారకూడదని, వచ్చే కాలంలో మరింత జాగ్రత్త అవసరమని స్పష్టమవుతోంది.
