Cargo Ship: మెక్సికోకి కార్ల లోడుతో వెళ్తున్న ఓ భారీ కార్గో నౌక ఉత్తర పసిఫిక్ మహాసముద్రంలో మునిగిపోయింది. ఈ నౌకలో మొత్తం మూడు వేల కార్లు లోడ్ చేయబడి ఉండగా, వాటిలో 800 కార్లు ఎలక్ట్రిక్ వాహనాలు కావడం విశేషం. లండన్‌కు చెందిన ఓడ నిర్వహణ సంస్థ జోడియాక్ మారిటైమ్ ఈ విషయాన్ని అధికారికంగా వెల్లడించింది. ఈ నౌక మునిగిపోయిన ప్రాంతం అలస్కాలోని అల్యూటియన్ దీవుల వద్దగా గుర్తించారు.
గత కొన్ని వారాల క్రితమే ఈ కార్గో నౌకలో అగ్నిప్రమాదం సంభవించింది. ప్రత్యేకించి నౌక వెనుక భాగంలో ఉన్న ఎలక్ట్రిక్ కార్ల వల్ల మంటలు తీవ్రంగా వ్యాపించాయని అధికారులు తెలిపారు. లిథియం-ఐయాన్ బ్యాటరీల కారణంగా భారీగా పొగలు వచ్చాయి. అప్పటి నుంచి నౌక క్రమంగా మునుగుతూ చివరికి పూర్తిగా సముద్ర గర్భంలోకి వెళ్లిపోయింది.
ఈ ప్రమాద సమయంలో నౌకలో 22 మంది సిబ్బంది ఉన్నారు. వీరంతా సకాలంలో లైఫ్‌బోట్‌ల ద్వారా బయటపడగలిగారు. సమీపంలో ఉన్న మర్చంట్ మెరైన్ అనే వాణిజ్య నౌక వారి ప్రాణాలను రక్షించింది. ఈ ఘటనపై స్పందించిన యూఎస్ కోస్ట్‌గార్డ్ ప్రతినిధి, జూన్ 3న అగ్నిప్రమాదానికి సంబంధించిన సమాచారం తమకు అందినప్పటి నుంచే తాము పర్యవేక్షణ కొనసాగిస్తున్నామని తెలిపారు.
ఈ ప్రమాదం వల్ల పెద్దగా కాలుష్యం కలగలేదని స్పష్టంగా చెప్పారు. కానీ ముందస్తుగా అవసరమైన పర్యావరణ భద్రత చర్యలు తీసుకున్నామని, కాలుష్య నియంత్రణ పరికరాలతో కూడిన రెండు సాల్వేజ్ టగ్‌లను మునిగిన ప్రాంతంలో పంపినట్టు పేర్కొన్నారు.
పర్యావరణ నిపుణుల అభిప్రాయం మేరకు, సముద్రంలో మునిగిన వాహనాల లిథియం బ్యాటరీలు జలవనరులపై దీర్ఘకాలిక ప్రభావాన్ని చూపే అవకాశం ఉన్నది. ప్రస్తుతం అమెరికా కోస్ట్ గార్డ్‌ బృందం అక్కడ గమనిక కొనసాగిస్తూ పర్యావరణంపై ప్రతికూలతలు ఏమైనా ఉండే అవకాశం ఉందా అనే విషయంపై అధ్యయనం చేస్తోంది.
ఈ ఘటనకు సంబంధించిన దృశ్యాలు ప్రస్తుతం సోషల్ మీడియా వేదికలపై వైరల్ అవుతుండగా, ఇది ఒక ప్రక్షాళిత నౌకాప్ర‌మాదంగా మారిందంటూ అంతర్జాతీయ నిపుణులు అభిప్రాయపడుతున్నారు. వాణిజ్య రవాణాలో ఎలక్ట్రిక్ వాహనాల భద్రతపై మళ్లీ చర్చ మొదలవుతోంది.
