భార‌త‌దేశం.. అరుదైన ఖ‌నిజ నిక్షేపాల సంప‌ద. బంగారు గ‌నులు, వజ్రాలు, కీల‌క ఖ‌నిజాలెన్నింటికో నిల‌యం. ఇప్పుడు దేశ చ‌రిత్ర‌లోకి మ‌రో కీల‌క పుట చేర‌నుంది. అతి పెద్ద వజ్రాల గ‌ని ఒకటి దేశ సంప‌ద‌లో చోటు ద‌క్కించుకోనుంది. మధ్యప్రదేశ్ రాష్ట్రంలోని ఛతర్‌పుర్ జిల్లాలో బక్స్‌వాహా అడవుల్లో రూ.70 వేల కోట్ల విలువైన వజ్ర నిక్షేపాలు ఉన్నట్లు అధికారులు గుర్తించారు.
బక్స్‌వాహా అడవుల్లో భూగర్భంగా దాగి ఉన్న వజ్రాల మొత్తాన్ని జియోలాజికల్ సర్వే ఆఫ్ ఇండియా (GSI) అంచనా వేసింది. వారు నిర్వహించిన మినరల్ సర్వే ప్రకారం, ఈ ప్రాంతంలో 6,000 కిలోలకుపైగా వజ్రాలు ఉండే అవకాశముందని తేలింది. ఇది ఆర్థికంగా చూస్తే రూ.70,000 కోట్ల మార్కెట్ విలువకు సమానం.
ఇప్పటికే ప్రభుత్వం ద్వారా ఈ ప్రాంతంలో మైనింగ్ చేపట్టేందుకు అనుమతుల ప్రక్రియ మొదలయ్యింది. హిందుస్థాన్ జింక్ లిమిటెడ్, వేదాంతా గ్రూప్ వంటి ప్రముఖ కంపెనీలు మైనింగ్ హక్కుల కోసం ముందుకు వచ్చాయి.
ఈ వజ్రాల మైనింగ్ వెనుక ఉన్న ఘోర వాస్తవం ఏమిటంటే, ఇది బక్స్‌వాహా అడవిలో సుమారు 2 లక్షల చెట్ల‌ను న‌రుకుతూ.. వంద‌ల ఎక‌రాల అట‌వి సంప‌ద‌ను ధ్వంసం చేసేందుకు కారణమవుతుంది. ఈ అడవి మాత్రమే 382 హెక్టార్ల విస్తీర్ణంలో ఉంది. ఇది కేంద్ర భారతదేశానికి శ్వాసకోశంలా పనిచేస్తోంది.
పర్యావరణ ఉద్యమకారులు, స్థానిక ఆదివాసీ గిరిజనులు ఈ మైనింగ్‌కు గట్టి వ్యతిరేకత చూపిస్తున్నారు. ఇది పర్యావరణానికి తీవ్రమైన నష్టం కలిగించనుంది అనే అభిప్రాయం గలవారు, ఈ ప్రాజెక్ట్‌ను నిలిపివేయాలని డిమాండ్ చేస్తున్నారు. ఇప్పటికే పర్యావరణ పరిరక్షణ సంస్థలు, స్థానిక గిరిజన సంఘాలు ఈ అంశాన్ని నేషనల్ గ్రీన్ ట్రిబ్యునల్ (NGT), సుప్రీంకోర్టుల దృష్టికి తీసుకెళ్లాయి.
ఇదిలా ఉండగా, ప్రభుత్వ వర్గాలు మాత్రం, అధునాతన మైనింగ్ టెక్నాలజీ ద్వారా చెట్లకు హానీ కలగకుండా మైనింగ్ చేయవచ్చని, ట్రీ ప్లాంటేషన్ కాంపెన్సేషన్ ద్వారా పునరావాసం చేయగలమని చెబుతున్నాయి. కానీ, పర్యావరణ నిపుణుల మాటల్లో ఇది చెల్లుబాటు కావడంలేదు.
ప్ర‌భుత్వానికి ఆధాయ మార్గం!
ఈ వజ్ర నిక్షేపాలు భారతదేశంలోనే అత్యధికమైనవిగా భావించబడుతున్నాయి. మధ్యప్రదేశ్ ప్రభుత్వం ఈ ప్రాజెక్ట్ ద్వారా వేల కోట్ల ఆదాయాన్ని పొందే అవకాశముంది. అంతేకాదు, స్థానికంగా వేలాది ఉద్యోగ అవకాశాలు, మౌలిక వసతుల అభివృద్ధి కూడా ప్రభుత్వం వాదిస్తున్న పాయింట్లలో ఒకటి. అయితే, వనాల నాశనం, జీవవైవిధ్యానికి ముప్పు వంటి అంశాలు రాజకీయ, పర్యావరణ వర్గాల్లో పెద్ద చర్చకు దారి తీస్తున్నాయి.
Diamond Treasures, Madhyapradesh, India, MP, BJP
