Hit3: నేచుర‌ల్ స్టార్‌ నాని నటించిన చిత్రం ‘హిట్- 3’ Hit 3 (హిట్ : ది థర్డ్ కేస్) బాక్సాఫీస్ రికార్డులు బ‌ద్ద‌లు కొడుతోంది. నాని(Nani) కెరీర్‌లోనే తొలిసారి విడుద‌లైన తొలిరోజునే రూ.43 కోట్ల గ్రాస్ వ‌సూళ్లు చేసిన ఈ చిత్రం.. రెండు రోజుల్లో రూ.62కోట్లు రాబ‌ట్టింది. మే 1న విడుద‌లైన ఈ స‌స్సెన్స్ క్రైమ్ థ్రిల్ల‌ర్ క‌లెక్ష‌న్ల వ‌ర‌ద పారిస్తోంది. శుక్రవారం డీసెంట్ ఆక్యుపెన్సీతో థియేటర్లలో ప్రదర్శితమైన ఈ చిత్రం రెండో రోజే రూ. 50 కోట్ల మార్క్‌ను దాటేసింది. ప్ర‌స్తుతం థియేటర్లలో పోటీ లేక‌పోవ‌డంతో పాటు ఈ రెండు రోజులు వీకెండ్ మ‌రింత కలిసి రానుంది.
నిన్న ఒక్కరోజే ఈ సినిమా రూ. 19 కోట్ల గ్రాస్ వసూళ్లను సాధించినట్లు మేకర్స్ అధికారికంగా ప్రకటించారు. దీంతో రెండు రోజుల్లోనే ‘హిట్ 3’ ప్రపంచ వ్యాప్తంగా రూ. 62 కోట్ల గ్రాస్ వసూళ్లను అందుకుంది. “బాక్సాఫీస్ వద్ద అర్జున్ సర్కార్ వేట కొనసాగుతోంది” అంటూ చిత్ర బృందం ప్రత్యేక పోస్టర్‌ను విడుదల చేసింది. మ‌రోవైపు టికెట్ బుకింగ్ యాప్ బుక్ మై షోలో కూడా ఈ సినిమాకు విశేషమైన స్పందన లభిస్తోంది. మొదటి రోజు 2.70 లక్షల టికెట్లు అమ్ముడవగా, రెండో రోజు 2.06 లక్షల టికెట్లు అమ్ముడయ్యాయని బుక్ మై షో తెలిపింది. ‘హిట్’ యూనివర్స్‌లో భాగంగా వచ్చిన ఈ సినిమాలో కేజీఎఫ్ (KGF) బ్యూటీ శ్రీనిధి శెట్టి (Srinidhi Shetty) హీరోయిన్‌గా నటించగా, మిక్కీ జే మేయర్ సంగీతం అందించారు. సాను జాన్ వర్ఘీస్ సినిమాటోగ్రఫీ బాధ్యతలు నిర్వర్తించారు. యునానిమస్ ప్రొడక్షన్స్‌తో కలిసి వాల్ పోస్టర్ సినిమా బ్యానర్‌పై ప్రశాంతి తిపిర్నేని ఈ చిత్రాన్ని నిర్మించారు.
